بم سے اُڑانے کی دھمکی دینے والے ملزم کو پولس کسٹڈی

ناندیڑ : ۷؍مئی (اعتمادنیوز)ناندیڑ شہر کے مشہور و معروف گرودوارہ اور ریلوے اسٹیشن کو بم سے اُڑادینے کی دھمکی کا ایس ایم ایس روانہ کرنے والے نوجوان کو پولس نے گزشتہ کل گرفتار کیا تھا ۔ اس نوجوان کو آج عدالت میں پیش کیا گیا ۔ جج نے اُسے ۸؍مئی تک پولس کسٹڈی میں رکھنے کے احکامات دئیے ہیں ۔ تفصیلات کے مطابق گزشتہ ۳؍مئی کو ریلوے کے موبائل فون پر ناندیڑ ریلوے اسٹیشن اور گرودوار ہ کو بم سے اُڑادینے کی دھمکی کا ایس ایم ایس موصول ہوا تھا ۔ اس واقعہ کی سنگینی کو دیکھتے ہوئے ایس پی پرم جیت سنہہ دھیا کی ہدایت پر ناندیڑ میں چوکسی کے اقدامات اُٹھائے گئے او ر ایس ایم ایس روانہ کرنے والے کا سراغ لگاکر اُسے گزشتہ شام گرفتار کیا



گیا ۔ بم سے اُڑانے کی دھمکی دینے والا شری کانت جناردھن بھوسلے (۲۴سال ) ساکن کومٹھے گاؤں ضلع ساتارا کو گرفتار کرکے اُس کے خلاف وزیر آباد پولس اسٹیشن میں مختلف دفعات کے تحت مقدمہ درج کیا گیاتھا ۔ اس کے پاس سے مزید ۴؍سم کارڈ بھی برآمد ہوئے تھے ۔آج معاملے کی تحقیقات کررہے انسپکٹر اور ان کی ٹیم نے ملزم شری کانت بھوسلے کو ناندیڑ عدالت میں پیش کیا ۔ تحقیقات کیلئے پولس نے کسٹڈی طلب کی تھی ۔ جج اجیت بھسمے نے ملزم کو ۸؍مئی تک پولس کسٹڈی میں رکھنے کے احکامات دئیے ہیں ۔ واضح رہے کہ ملک میں کچھ فرقہ پرست دہشت گرد سازشیں رچ کر مسلمانوں کو بدنام کررہے ہیں ۔ پولس کو ضروری ہے کہ وہ ایسے دہشت گردوں کا سراغ لگاکر انہیں بھی بے نقاب کریں ۔